Gilayon nga nagpagwa sang Executive Order No. 73 si Bacolod City Mayor Evelio Leonardia nga nagamando sang pagbalik sang ciudad sang Bacolod sa Modified General Community Quarantine (MGCQ) sumugod sa Desyembre 1 tubtob 31 gikan sa status nga General Community Quantine (GCQ).
Ini ang ginpagwa kasunod sang pag-anunsyar ni President Rodrigo Duterte nga igapaidalum ang National Capital Region (NCR), Batangas, Iloilo City, Tacloban City, Lanao Del Sur, Iligan kag Davao City kag Davao del Norte sa General Community Quantine (GCQ) samtang ang nabilin naman nga bahin sang pungsod kalakip ang Bacolod City ang ipaidalum na sa Modified General Community Quarantine (MGCQ).
Nabutang na sadto sa MGCQ ang Bacolod sang Mayo 31 samtang nagsaka naman ini sa GCQ status sang Setyembre.
Sang tinalikdan, makapila naman ka beses nga nag-apelar ang City Government sa National Inter-Agency Task Force (NIATF) nga mapanaog ang status sang Bacolod sa MGCQ apang wala ini ma-aprubahan sa una nga paghingyo apisar sang madinalag-on nga pagpakigbato batok sa COVID-19 sang Emergency Operation Center sa pagpanguna ni Retired Maj. Gen. Melquides Feliciano.
Sa idalum sang section 4 sang Executive Order No. 73, ang curfew ang magasugod takna alas-11:00 sang gab-i kag matapos takna alas-4:00 sang kaagahun.
