Nagpasalig ang alkalde sa ciudad sang Silay sa pag-abaga sang tanan nga gasto sang pamilya sang mga napatay kasubong man nasamaran sa pagkatumba sang mini dump truck sang Silay City Government sa Barangay Guimbalaon, Silay City, Negros Occidental.
Silay City Mayor Joedith Gallego
Nahibaluan nga pito ang napatay, lima ang kritikal ang kondisyon kag 13 ang nag-angkon sang minor injury sa nasambitan nga aksidente.
Sakay sa nasambitan nga dump truck ang 24 ka mga Job Order casuals gikan sa Silay City Government nga nagpatigayon sang tree planting activity sa Sitio Patag sa nasambitan nga ciudad.
Isa sa kumpirmado nga napatay si Alex Balili ang General Services Office head sang Silay City Government, kasubong man ang iya sekretarya.
Ginpadulungan mismo sa alkalde ang mga ospital kun sa diin gindala ang mga pasyente agud tsekyaron ang ila kondisyon.
Sa interview sang Bombo Radyo Bacolod kay Gallego, ginatinguhaan nila nga mahatag ang sarang mabulig para sa mga nalisdan nga pamilya kasubong man ang mga ginabulong sa ospital.
Pasalig sini nga indi magapabaya ang city government.
Ginakasubo sini ang natabo, apang nagapangabay na lamang ini sa mga pamilya sang biktima nga magbinuligay bangod aksidente kag indi hungod ang natabo.
Ang alkalde ang kaupod man sa pagpatigaon sang tree planting activity.
