Nagpaandam si Bacolod City Mayor Greg Gasataya batok sa mga empleyado sang ciudad nga ginapatihan nagagamit sang ila posisyon ukon estado agud makalikaw sa pagbayad sa mga food kag beverage establishments sa Bacolod.
Suno kay Gasataya, nakabaton siya sang mga impormasyon angot sa amo nga alegasyon kag gilayon nga nagmandu sang imbestigasyon agud mahibaluan ang matuod nga natabo.
Ginpabutyag man sang alkalde nga indi dapat pag-abusuhon ang mga lokal nga negosyante bangud sila ang mga taxpayers nga nagapangabudlay para sa ila matarong nga pangabuhi kag kinahanglan nga protektahan, indi pagpiguson.
Sa karon, wala pa ginpagwa ang ngalan sang mga imbulbado bangud padayon pa ang imbestigasyon kag pagpatuman sang due process.
Apang ginpahayag sang alkalde nga kon mapamatud-an ang alegasyon, indi niya ini pagatolerahon kag may nagakaigo nga tikang nga ipatuman batok sa mga responsable.
Dugang pa sang alkalde wala man ginadumilian ang paglingawlingaw apang dapat nga magbayad sang insakto bangud may mga sweldo man ang mga ini kag pila lang man ang ginansya sang mga negosyante.
