Nagalaom ang alkalde sa ciudad sang Bacolod nga magapadayun ang intensity sa pagserbisyo sang mga Barangay and Sangguniang Kabataan officials apisar nga wala sang eleksyon sa Disyembre subong nga tuig.
Ini kasunod sang pagpirma ni President Ferdinand “Bongbong” Marcos Jr. sa Republic Act 12232 ukon ang layi nga nagabag-o sa term of office sang Brgy and SK officials kag nagapostpone sang Barangay and Sangguniang Kabataan Elections sa Nobyembre 2026.
Sa interview sang Bombo Radyo Bacolod kay Bacolod City Mayor Greg Gasataya, ginpahayag sini nga siya ang isa sa mga nagboto pabor sa postponement sang siya ang miyembro pa sang House of Representatives.
Karun nga nakadesisyon na ang Presidente, nagalaom si Gasataya nga ini ang magaserbe nga encouragement sa mga Brgy kag SK officials nga magpadayun kag mapabilin ang intensity sang trabaho apisar nga malayo pa ang eleksyon. Samtang., nagalaom ang Punong Barangay sang Barangay Granada, Bacolod City nga liwat nga mabutangan sang pondo ang Ayuda sa Kapos ang Kita Program (AKAP) sa 2026.
Ini matapos nga wala nalakip sa ginsumiter nga 2026 National Expenditure Program (NEP) sang Department of Budget and Management ang programa.
Sa interview sang Bombo Radyo Bacolod kay Punong Barangay Armando Vito, masobra libo ang mga benepisyaryo sang AKAP sa ila Barangay kag madamo pa sang nagatinguha nga malakip.
Aminado si Vito nga sila ang may iban paman nga assistance program gikan sa gobyerno kaangay sa Tulong Panghanapbuhay sa Ating Disadvantaged/Displaced Workers (TUPAD), apang ang AKAP amo ang mas mahapos nga financial assistance nga indi na kinahanglan magtrabaho sang pila ka adlaw antes makuha ang financial aid nga P3,000 tubtob P5,000.
Suno sa Punong Barangay, ginaseguro nila nga mga pigado nga pamilya gid ang maka-avail sang programa.
Agud malikawan ang pamulitika kag pagpapili lang sang pasudlon sa programa sang mga Barangay officials, ang mga Barangay Health Workers amo ang ila nga ginapasurvey sa tagsa ka Purok kag ginapalista ang kwalipikado nga mabuligan.
Suno diri, sa kapigaduhon sa karun, dako gid nga bulig ang AKAP para sa mga pigado.
Ang requirements agud makabatun sang bulig pinansyal ang matumod nga benepisyaryo amo ang proof of indigency, kag valid IDs nga magaserbe pamatuod nga sila ang residente sa lugar.
Nagapati naman si Vito nga mahimo pa mahatagan sang pondo ang programa.
Ini bangod magalabay pa sa Kamara kag Senado ang deliberasyon para sa pagdihon sang National Budget, kag ang 2026 NEP sang DBM ang rekomendasyon lamang.
Sa pihak sini, ginapahanumdom man sang Punong Barangay sa iya mga constituents nga indi magsalig sa bulig pinansyal.
Nagapati si Vito nga resilient ang mga taga-Barangay Granada, kag makasarang mangita sang palangitan-an kaangay sa ila ginahimo antes pa napatuman ang aid distribution programs.
