Nagpasalig si Bacolod City Mayor Greg Gasataya sang transparency kag compliance gikan sa 61 ka brgy sa ciudad sang Bacolod matapos maturn-over ang P12 million nga financial assistance sa idalom sang Bawat Barangay Makikinabang (BBM) program sang Office of the President.
Kahapon sang aga, nabaton na sang mga Punong Brgy ang tig-P200,000 financial grant.
P100,000 diri ang magakadto sa project sang Barangay, samtang ang P100,000 ang para naman sa lima nga mapilian nga Presidential scholar nga magabatun sang tig-P20,000.
Suno kay Mayor Gasataya, gina-require niya ang tanan nga mga Punong Brgy nga magpasa sang certification sang mga beneficiaries agud masiguro nga ang ginpili nga scholars ang indi miyembro ukon paryente sang isa ka incumbent barangay official kag ang makabenepisyo amo ang nagakinahanglan.
Ini bangud indi luyag sang Akalde nga matabo sa ciudad ang natabo sa pila ka mga LGU nga sa ulihi ginbalik ang kwarta bangud sa reklamo sang mga pumuluyo nga ang ila kaugalingon nga bata ang ginpasulod sa scholarship.
Suno diri, may qualification nga dapat sundon sang tagsa ka mga brgy kag ini ang iga-follow up sang DILG Bacolod.
Ginarequire man nga ipost ang tanan nga impormasyon tuhoy sa distribution lakip na ang pagsumiter sang fund utilization report kada 30 ka adlaw para sa community projects nga luyag nga implementar sang tagsa ka brgy.
Ginpasalamatan sang Alkalde si President Ferdinand Marcos Jr sa pagpaambit sang programa sa tanan nga mga brgy.
Nagpasalamat man ini sa kooperasyon sang tanan nga brgy sa pagkompleto sang kinahanglanon nga requirements para sa pagrelease sang pondo.
Nagpasalig si Mayor Gasataya nga ang ciudad ang hugot nga makigkoordinar sa barangay officials kag national government agencies agud masiguro nga ang pondo ang magamit sa husto, episyente kag may transparency.
