Ginbisitahan ni Bacolod City Mayor ang mga menor de edad nga nagapangayo kag nagapamahog nga nadakpan sang mga kapulisan sa Bacolod Police Station 1 agud maseguro nga masunod ang nagakaigo nga proseso.
Nahibaluan nga madasig nga naglapta sa social media ang video sang mga solterito nga naga-edad 12, 13 kag 15 anyos samtang nagapangayo-kayo sa isa ka fastfood chain sa palibot sang Bacolod City Public Plaza bitbit ang patalom.
Sa interview sang Bombo Radyo Bacolod kay Anjanette Servano, focal person sang Bacolod City Anti-Mendicancy Task Force, ang mga kabataan ang natumod nga residente sang Barangay Bata, Brgy 35 kag Brgy 12.
Duha sa mga ini ang nakatinir naman sadto sa facility sang Department of Social Services and Development sa Barangay Felisa samtang ang isa ang bag-o lamang sa ila record.
Paathag sini nga ang nasambitan nga mga kabataan ang masami nagalibot-libot sa Bacolod Public Plaza kag ini ang ila man nga ginareach-out agud mapasulod sa street education.
Apang suno kay Servano, nakahibalo na ang mga kabataan nga sila ang kuhaon kag gani kun makita ang City Anti-Mendicancy Task Force, sila ang nagapalagyo.
Nagkoordinar naman ang mga ini sa natungdan nga Barangay agud malab-ot ang guardians ukon ginikanan sang mga kabataan.
Kasunod sini, ang area district worker na ang magahimo sang interventions.
Samtang nagpahayag naman si Bacolod City Mayir Greg Gasataya nga dapat mangin wake-up call na sa mga ginikanan ang hitabo.
Suno diri, sang madakpan ang mga kabataan gilayon man niya nga ginpadulungan bangod aminado ini nga may nagakaigo nga proseso sa paghandle sang mga menor de edad.
Nagkoordinar naman ini kay DSSD Head Richelle Verdeprado-Mangga, kag sila ang may natalana na nga tikang nga himuon.
Panugyan ni Mayor Greg sa mga ginikanan nga indi na hulaton pa nga may malain nga matabo sa mga kabataan ukon sila ang makahimo sang kalainan sa iban.
Samtang nagkoordinar naman ini kay Bacolod City Police Office director Police Col. Joeresty Coronica, nga nagpasalig sang pagpasanyog pa sang police visibility.
