Natalana nga makigsapol ang alkalde sang ciudad sang Bacolod sa tanan nga mga Punong Barangay sang 61 ka mga Barangay angot sa pagpatuman sang ordinansa sa anti-dumping kag anti-littering.
Sa press conference ni Bacolod City Mayor Greg Gasataya, subong nga semana magasapol ini sa mga Punong Barangay antes ang pagpatuman sang Information Dissemination Campaign may kaangtanan sa pagpatuman sang anti-dumping kag anti-littering ordinance kasubong man ang pagpanakop sa mga nagalapas sang nasambit nga ordinansa.
Dugang pa sini nga ang Barangay ang dapat nga magbantay sang mga waterways agud nga indi paghabuyan sang basura nga mangin rason sang pagsupon kag magatuga sang pagbaha sa tion nga mag-inulan.
Suno pa sa alkalde dapat ang mga pumuluyo na mismo ang maghimo sang ila bahin agud nga mangin in-order ang ciudad.
Suno diri, bisan wala sang nagabantay kun ang tawo mismo ang nakahibalo sang responsibilidad kag obligasyon manami kuntani ang ciudad.
Panawagan sang alkalde sa tanan nga maghimo sang ila nga bahin para sa solid waste management kasubong man sa contractor nga ginabayran sang ciudad nga himuon ang tanan nga masarangan para sa mas maayo nga garbage collection sa ciudad.
