Hulaton pa ang ipagwa nga Executive Order sang alkalde angot sa pagpaidalom sa mga market vendors sa tatlo ka mga dalagko nga merkado sa syudad sa swab testing.
Sa interview sang Bombo Radyo Bacolod kay Councilor Renecito Novero, desidido si Inter-Agency Task Force deputy chief implementer for Visayas Melquiades Feliciano nga dayunon ang swab testing sa mga market vendors.
Suno kay Novero, ang ginpahayag ni Executive Assistant to the Mayor Ernie Pineda ang wala nagakahulugan nga siraduhon ang balaligyaan kundi indi lang tugutan nga makabaligya ang nagbalibad apang mahimo man sini pabuslan sang iya himata nga mahimo magbaligya.
Suno sa konsehal, tinguhaan sang syudad nga masolusyunan ang ginapangatubang nga pandemya apang ginapangitaan man sini sang paagi nga indi man maapektuhan ang ekonomiya.
Suno diri ang tinutuyo sang pagpaswab sa mga vendors amo ang surveillance gani wala ginarequire nga iquarantine ang nakuhaan sang sample apang igamonitor naman sila sang City Epidemiology Surveillance Unit (CESU).
Ang pool testing amo ang paggrupo sang specimen kag itest ini, kun sa diin kun may magpositibo, igatest liwat ang grupo agud makita ang positibo nga pasyente kag ma-isolate.
Ginaengganyo man ang tanan nga mga vendor nga magpaidalom sa swab test.
Suno diri, daw kaangay nga nagapangatubang sa giyera ang sitwasyon subong bangud luyag man naton nga mangin convenient kag komportable ang sitwasyon.
Indi naman ini mahimo nga malampuwas nga wala sang sakripisyo.
Wala naman sang programa ang gobyerno nga ginapatuman agud halitan ang mga residente sini, gani malayo suno kay Novero nga pahugon ang mga vendors nga siraduhan ang ila balaligyaan kun indi magpaswab test.
