Nagaplano ang alkalde sa ciudad sang Bacolod nga mag-apelar liwat sa national inter-agency task force (NIATF) nga idowngrade sa modified general community quarantine (MGCQ) nagikan sa GCQ ang status sang ciudad sa tunga-tunga sang bulan sang Nobyembre.
Nahibaluan nga nagpagwa sang Executive Order No. 70 si Mayor Evelio “Bing” Leonardia natuhoy sa extension sang General Community Quarantine (GCQ) sa Bacolod City halin Nobyembre 1 tubtob Nobyembre 30, 2020.
Madumduman nga gin-anunsyar ni Presidente Rodrigo Duterte sadtong Oktubre 27 sa iya televised speech nga magapabilin ang ciudad sa idalom sang general community quarantine sa bulan sang Nobyembre agud nga mapunggan ang paglapta sang coronavirus.
Matapos ini, nagpadala sang apelasyon si Leonardia agud nga ipaidalum ang ciudad sa MGCQ sang Biyernes apang wala gin-aprubahan sang National Inter-Agency Task Force ang hingyo sang alkalde apisar nga pabor diri ang Regional IATF.
Sa interview sang Bombo Radyo Bacolod kay Leonardia, ginpahayag sini nga magapabilin ang alas 10:00 sang gab-i tubtob alas 4:00 sang kaagahon nga curfew; pagpahanugot sa pagbaligya sang alcohol halin alas 12:00 sang udto tubtob alas 6:00 sang hapon; kag iban pa nga mga pagsulundan sa idalum sang GCQ.
Magapabilin man nga bukas ang tatlo ka mayor nga merkado kada Domingo samtang 30% na sang setting capacity ang pahanugutan sa mga religious gatherings.
Ang nasambit nga EO ang epektibo subong nga adlaw tubtob sa katapusan sang bulan.
Nagalaom naman si Leonardia nga aprubahan kag suportahan sang NIATF ang ila apelasyon sa masunod nga duha ka semana agud nga papanaugon sa MGCQ ang status sang ciudad.
Ginkumpirmar man sang alkalde nga 28 ka mga barangay karon ang COVID-free sa Bacolod.
