Natalana nga magpapanaog sang mga executive orders si Bacolod City Mayor Evelio Leonardia nahanungod sa pag-suspinder sang commencement exercises sa tanan nga eskwelahan kag lebel sa ciudad sang Bacolod subong man ang timprano nga pagpasirado sang school year 2019-2020 sini nga Marso bangud sa kahangawa sa local transmission sang coronavirus disease 2019 (COVID-19).
Sa interview sang Bombo Radyo Bacolod kay Vice Mayor El Cid Familiaran, ginkumpirmar sini nga matapos ang serye sang pagsinapol kag konsultasyon upod ang Department of Education (DepEd) kag Commission on Higher Education (CHED) kag iban pa nga opisyal kag sektor sang ciudad, nadesisyunan sang alkalde nga ang tanan nga mga pampubliko nga eskwelahan ang maga-sira sang ila klase sa Marso 20 samtang ang klase naman sa mga private schools sa tanan nga level ang magatakop sa Marso 27.
Tanan man nga mga pampubliko nga kolehiyo sa Bacolod ang dapat magsirado sang ila klase sa Marso 27.
Suspendido man ang moving-up ceremonies sa tanan nga day care centers kag ang ila naman klase ang magatapos sa Marso 13.
