Nag-apelar si Bacolod City Mayor Evelio “Bing” Leonardia sa National Inter-agency Task Force Against COVID-19 nga magpadala sang augmentation personnel sa Bacolod agud i-address ang kakulangan sang mga nurses kag healthcare workers sa mga pribado nga ospital.
Matapos personal nga magpangayo sang bulig kay Secretary Carlito Galvez, chief implementer sang National Action Plan Against COVID-19 nahanungod sa nasambit nga butang, liwat nga nagpadala sang sulat si Leonardia sang Setyembre 23 agud ireiterate ini.
Suno sa alkalde, nagakinahanglan ang mga ospital sa Bacolod sang anum ka mga doktor para sa mIdway Referral Facility, 288 ka mga nurses para sa emergency treatment center kag isolation facilities sang ciudad, 18 ka mga radiology technicians, 26 ka medical technologist, 24 ka mga respiratory therapists kag 30 ka mga housekeeping staff.
Sa sulat nga ginpadala ni Leonardia, ginpahayag sini nga ang kakulangan sang mga nurse kag healthcare workers sa mga pribado nga ospital ang dako gihapon nga problema gani nagahingyo ini sang assistance paagi sa pagpadala sang dugang nga mga personnel agud makapatigayon na sang full operation ang mga isolation units sang mga ospital.
As of October 4, may yara na sang 154 ka mga pasyente sang COVID-19 nga naka-admit sa mga ospital sa Bacolod gani nagdangat na sa 77% ang capacity utilization rate.
