Gin-athag sang alkalde sang ciudad sang Bacolod nga wala ini nagapamalabag sa pagpauli sang mga seafarers kag iban pa nga overseas Filipino workers nga nastranded sa Metro Manila bangud sa enhanced community quarantine kaangot sang coronavirus disease.
Suno kay Mayor Evelio Leonardia, may mga OFWs nga nakabalik na sa ciudad sadtong nagliligad nga semana.
Ang issue sa karon suno sa alkalde amo ang koordinasyon sa tunga sang mga national government offices kag sang Bacolod City.
Suno kay Leonardia, handa ang ciudad sa pagbaton sa mga OFWs kag nagapakig-angot sa Overseas Workers Welfare Administration (OWWA) sa City Councilor Israel Salangga, chairman sang Action Team on Returning OFWs, agud makuha ang listahan kag matumod ang numero sang mga Bacoleño nga magaabot.
Apang sang Sabado, nakibot sanday Leonardia kag Negros Occidental Governor Eugenio Jose Lacson nga may trip nga gin-arrange ang Maritime Industry Authority (MARINA) nga sakyan sang mga seafarers kag wala nakahibalo sini ang Bacolod City government kag ang Kapitolyo.
Panindugan sang alkalde, indi luyag sang LGU nga masulit ang natabo sang tinalikdan nga sinemana nga may OFWs nagikan sa Cebu nga nagpakita sang certificate nagikan sa DOH nga nakatapos sila sa quarantine sa ginhalinan apang positibo sa COVID sang nag-abot sa EB Magalona.
Suno kay Leonardia, ang tanan nga OFWs nga magaabot ang magapaidalom sa 14-day mandatory quarantine sa isolation facility kag polymerase chain reaction test bisan nakalabay na sila sa PCR test antes nagpauli.
Pamilit sang alkalde, para ini sa proteksyon sang OFWs kag sang tanan nga pumuluyo.
