Nagsulat si Bacolod City Mayor Evelio Leonardia sa National Inter-Agency Task Force (NIATF) nga ibalik na sa Modified General Community Quarantine (MGCQ) ang status sang Bacolod.
Nahibaluan nga ang quarantine status sang ciudad nga General Community Quarantine (GCQ) ang tubtob sa katapusan sang Oktubre.
Apang santo sa apelasyon ni Leonardia nga ginpasa sang Oktubre 15, luyag sini nga manaog na ang Bacolod sa MGCQ kuntani kahapon Oktubre 16.
Suno kay Bacolod City Administrator Em Legaspi – Ang, ang apelasyon ang kasunod sang pagnubo sang kaso sang COVID-19 sa ciudad kag nakita nga nakahanda na para sa MGCQ.
Madumduman nga sa ginpatigayon nga surveillance testing sa tatlo ka mayor nga merkado sa ciudad nga nagdangat sa 1,665 ang nagpositibo ang nagdangat lang sa 25 ukon 1.5%.
Ang COVID-19 intervention ang ginhemu sang Bacolod sa idalum sang emergency operation system (EOC) nga ginpangunahan ni IATF chief implementer for Visayas nga si General Melquiades Feliciano, ang nagresulta sa pagnubo sang kaso sang COVID-19 sa sulod sang duha ka semana.
Sa ulihi nga data, Oktubre 15, may 591 nga aktibo nga kaso kag 4,491 naman ang kabug-usan nga record sang Bacolod.
Samtang ang recoveries naman ang nakalab-ot na sa 3,937 ukon 85.29%.
May lima naman nga nagtaliwan sa bulan sang Oktubre, nga madasig ang pagnubo kun ikumparar sa 64 nga nagtaliwan sang Setyembre.
Santo sa local government unit (LGU) risk matrix,ang duha ka semana nga pagsanyog sang COVID-19 cases ang yara sa 58% nga makabig manubo samtang ang average daily attack rate naman ang nagpanaog sa 5.32% nagikan sa 11% duha ka semana ang nanligad.
Nagsugod man sang localized web kag mobile application system ang ciudad nga gintawag Bacolod City Contact Tracing System (BacTrac) nga santo sa South Cotabato COVID-19 contact tracing system.
Santo sa sulat sang alkalde, hugot ang pagsalig sini nga handa na ang Bacolod sa pagbaylo padulong sa MGCQ.
Ginabantayan naman nga madeliberate sang NIATF sa Lunes ang apelasyon.
