Nagpagwa na kahapon sang Executive Order No. 60 si Mayor Evelio “Bing” Leonardia nga nagabutang sang Bacolod City sa modified enhanced community quarantine (MECQ) halin Setyembre 8 tubtob Setyembre 30 kaangot sa Resolution No. 69-A sang National IATF nga napetsahan Setyembre 7, 2020.
Nakasaad sa nasambit nga EO, magapadayon ang odd-even scheme sa mga Home Quarantine Pass; alas 10:00 sang gab-i tubtob alas 4:00 sang aga nga curfew; liquor ban apang sarang nga makabakal sang ilimnon alas 12:00 sang udto tubtob alas 6:00 sang gab-i kag sa pribado nga mga lugar lang mainom.
Suspendido man ang mga pampubliko nga transportasyon magluwas lang sa mga shuttle services para sa mga empleyado nga nagaubra sa mga ginapahanugutan nga establishemento ukon industriya.
Nagapabilin man nga sirado ang tatlo ka mga mayor nga merkado sa ciudad nga ginalakipan sang Libertad, Burgos kag Central Market kada Dominggo para sa disinfection.
Bukas ang mga non-leisure businesses sa mga mall kag commercial centers apang ginalimitahan lang sa 50% capacity.
Ginadumilian naman ang pag-operar sang mga negosyo nga yara sa Category III kag IV sa listahan sang Department of Trade and Industry nga indi sarang mag-operate sa idalum sang MECQ.
Samtang, delivery kag take out lang ang sarang nga maserbisyo sang mga restaurants.
Wala man ginapahanugutan ang mass gathering samtang tubtob lima ka tawo lang ang ginapahanugutan sa paghiwat sang mga religious activities.
Suspendido man ang pagpapauli sang mga locally stranded individuals (LSI) samtang igaregulate ang pagsulod sang mga authorized person outside residence (APOR) sa Bacolod.
Madumduman nga sa ginapatigayon nga meeting sang national inter-agency task force against COVID-19 sang Lunes, ginrekomendar ni COVID-19 Task Force Chief Implementer Carlito Galvez Jr. kag DOH Secretary Francisco Duque III kay Presidente Rodrigo Duterte nga ipaidalum ang ciudad sang Bacolod sa modified enhanced community quarantine (MECQ) santo sa rekomendasyon ni Environment Secretary Roy Cimatu kag General Melquiades Feliciano nga nagbisita diri sa ciudad sang tinalikdan nga sinemana.
