Nag-issue sang Executive Order No. 69 series of 2020 si Bacolod City Mayor Evelio “Bing” Leonardia nga nagadeklarar kay Inter-Agency Task Force (IATF)-Visayas chief implementer Retired Major General Mel Feliciano kag sa asawa sini nga si Mia bilang pinakauna nga “adopted couple of Bacolod City”.
Sa interview sang Bombo Radyo Bacolod kay Leonardia, ginpahayag sini nga kadungan sa testimonial dinner kag Appreciation Night para sa Feliciano couple kag sa Office of the Presidential Adviser on the Peace Process (OPAPP) team sa Bacolod Government Center kahapon, gindeklarar sini bilang pinakauna nga adopted couple ang mag-asawa sa sulod sang 82 ka tuig nga cityhood sang Bacolod.
Suno kay Leonardia, tuman gid ang pagpasalamat sang ciudad sa mag-asawa bangud sa sakripisyo nga ila ginhimo agud mabuligan ang city government nga mabatuan ang COVID-19 pandemic.
Dugang pa sang alkalde nga sa sulod sang duha ka bulan nga pagtinir nila sa Bacolod, dako gid ang nabulig sang ila nga expertise sa pagdihon sang epektibo nga action kag intervention agud mapunggan ang paglapta sang virus.
Nahibaluan nga si Mel ang nagpamuno sa Emergency Operations Center kag ang asawa naman sini nga si Mia amo ang nurse consultant sang EOC.
