Nagpasalig ang alkalde sa ciudad sang Bacolod nga indi sila mag-untat sa road clearing operation santo sa gihapon sa direktiba sang Department of the Interior and Local Government (DILG).
Madumduman nga sang nagligad nga Setyembre 2019, nakakuha sang 87% nga compliance rating ang ciudad nahanungod sa pagpang-hawan sa mga illegal structures sa dalan.
Suno kay Mayor Evelio “Bing” Leonardia, wala naga-untat ang ciudad sa pagpatuman sang nasambit nga mando.
Dugang pa sini, indi lang dapat ang ciudad ang magpanguna sa road clearing operations bangud dapat nagabulig man diri ang mga barangay officials.
Nagligad nga Biyernes, nagpatigayon sila sang meeting kaupod ang mga punong barangay sa ciudad kag ang DILG.
Santo sa mga report nga ginpasa sang kada barangay, 94% na ang mga na-demolish nga mga illegal structures sa ciudad.
Samtang, kumporme naman ang pinuno sang DILG-Bacolod nga si Ma. Joy Maredith Madayag sa pahayag ni Leonardia nga may yara sang responsibilidad ang mga barangay officials.
Suno kay Madayag, ang pag-maintain kag ang sustainability sang mga napang-hawanan na nga mga dalan ang obligasyon na sang kada barangay.
Dugang pa sini, kada bulan may yara gid sang reporting nga matabo nahanungod diri sa tunga sang Local Government Unit (LGU), barangay officials kag DILG.
