Nagpagwa na sang Executive Order No. 67 si Mayor Evelio “Bing” Leonardia nga nagapahanugot sa pagbalik sang biyahe kag pagsulod sa syudad sang Bacolod paagi sa Bacolod seaports ukon Bacolod-Silay Airport samtang nagapadayon ang General Community Quarantine halin sang Oktubre 1 tubtob Oktubre 31, 2020.
Nakasaad sa ginpagwa nga Executive Order sa Section 1 nga epektibo kahapon Oktubre 15, nga ginapahanugutan na ang mga pumuluyo nagikan sa Iloilo nga makasulod sa syudad apang dapat limitado lang sa pag-access sang essential goods kag services kag sa mga trabaho ukon opisina ukon industriya nga ginapahanugutan sa idalom sa provision sang Omnibus Guidelines on the Implementation of Community Quarantine sa Pilipinas nga ginamendahan sang Oktubre 8, 2020.
Ginadumilian sa gihapon ang paglagaw ukon leisure travel.
Sa section 2, sa pagbalik sang biyahe mahimo nga magsulod sa Bacolod City paagi sa Bacolod-Silay Airport bilang initial point of entry apang kinahanglan nga magcomply sa health protocols nga ginpatuman sang probinsya sang Negros Occidental antes magsulod sa syudad.
Pagasundon man sa gihapon ang mga health protocols nga ginapatuman sa mga Locally Stranded Individual(LSI) kag Repatriated Overseas Filipino Workers nga ginmando sa Executive Order 44 series of 2020 nga gin-issue sadtong Hunyo 18, 2020 kag sa Executive Order 51 series of 2020 nga may petsa Agosto 01 , 2020 nga ginamendahan sang Executive 51-A series of 2020 nga may petsa nga September 05, 2020 para sa mga Authorized Persons Outside Residences (APORs).
Ginamanduan man ang tanan nga nagabiyahe nga magparehistro sa port of entry para sa contact tracing purposes sa idalom sang guidelines kag procedures sang City Ordinance No. 841 series of 2020 bilang prerequisite sa ginapahanugutan nga magsulod sa syudad.
Ang pagpresentar sang QR code ang required para sa mga magasulod nga nagabiyahe nga may yara na sang QR code.
Para sa mga maga-avail sang QR Code, ang mga magabiyahe ang sarang nga makaaccess paagi sa Google sa pagsearch lang Bacolod City Covid-19 ukon bactrac.bacolodcity.gov.ph ukon mahimo man nga iassist sang mga pribado nga establisyemento nga concerned nga nagfacilitate sang ila pagbiyahe padulong sa syudad sang Bacolod pursuant sa City Ordinance 841.
Ang Executive Order ang magaepekto gilayon.
