Majority sa mga alkalde sang Local Government Units sang probinsya sang Negros Occidental ang nagapabor sa ginaduso nga Charter Change.
Suno kay Victorias City Mayor Javier Miguel “Javi” Benitez, presidente sang Association of Chief Executives (ACE) sang Negros Occidental, nakighinun-anon ini sa mga alkalde sang Negros Occidental kag majority diri ang pabor sa pag-amyenda sang konstitusyon sang Pilipinas basta sa bahin lamang sang Economic Provision.
Samtang, para naman sa alkalde sang banwa sang Pulupandan, Miguel Antonio Peña, pabor ini sa Economic Provision kag Political Provision apang wala ini nagapahanugot sa full ownership sang foreign investors sa pagbakal sang duta sa Pilipinas.
Apang, para sa alkalde sang Victorias, mas madamo sang isyu nga dapat italakay kumpara sa Charter Change, kaangay na lamang sa mahal nga presyo sang kuryente kag kalidad sang edukasyon sa pungsod.
Kun may manubo nga energy cost kag madamo sang skilled workers, suno kay Benitez, ini maka-ingganyo sa mga investors nga magsulod sa Pilipinas.
Pahayag ni Benitez, bilang presidente sang Association of Chief Executives (ACE) sang Negros Occidental, nagapabor ini sa Economic provision apang importante ang sentimento sang mga pumuluyo kag dapat nga respetuhon ang ila mangin desisyon.
