Ginpanawagan ni Sports Analyst Monico “Nukes” Puentevella nga i-upod sa pangamuyo ilabi na sa mga magasimba bwas ang kadalag-an ni Filipino boxing legend Manny “Pacman” Pacquiao batok kay Mexican-American boxer Mario Barrios.
Nahibaluan nga bwas kapin alas-10:00 ukon alas-11:00 sang aga ang main event sa Pacquiao-Barrios title bout para sa World Boxing Council (WBC) Welterweight World Championship belt.
Sa interview sang Bombo Radyo Bacolod kay former Congressman Monico “Nukes” Puentevella, adlaw-adlaw nga nagapatigayon sang praise and worship service si Pacquiao, nga tradisyon na sini sa tion nga may hampang.
Nakibot man ini nga sa ginpatigayon nga weigh in, napuno ang halos katunga sang MGM Grand Garden Arena sa Las Vegas, Nevada, USA, nga nagapakita nga dako gid ang epekto sang hampang ni Manny sa Las Vegas bisan pa nga ini ang madugay na nga nag-untat sa boksing.
Dugang pa ni Puentevella nga halos three-fourths sang mga naglantaw sa weigh in ang Filipino bangod sang gintawag si Barrios, halos pipila lamang ang nagcheer, apang sang si Pacquiao na ang gintawag, tuman ang hinugyaw sang mga tawo.
Nagapati ini nga masold-out ang tickets apisar nga ini ang mahal, kaangay sang iya ticket nga nagabalor $1,500.
Madamo man sang mga nagbisita nga politiko kag Pacquaio, kag agud madula ang pressure, basketball ang ila gin-estoryahan sang ulupod nga nagkaon.
Isa sa suhestyon ni Pacquiao, amo ang pasanyugon ang Manny Pacquiao Basketball League sa Bacolod City.
Gin-abisuhan man sini ang Pambansang Kamao nga temprano magpahuway agud kondisyon sa hampang, matapos nga makita nga ini ang wala sang pahuway sa pag-entertain sa mga bisita.
Panawagan ni Puentevella nga ipangamuyo ang kadalag-an ni Manny kag wala sang ma-injure sa hampang.
Ginlantaw sini nga ini na ang ulihi nga hampang ni Pacquiao kun siya ang malutos, kag hinali magdaog, para kay Puentevella mas maayo nga mag-untat na sa hampang ang Filipino champ.
Maayo suno diri ang kondisyon ni Pacquaio, samtang pressure naman para kay Barrios bangod ginalauman na nga kadam-an sa magalantaw ang magacheer para kay Pacquiao.
