Ginatugyan na sang Metro Bacolod Chamber of Commerce and Industry sa mga otoridad ang pagsolbar sa mga krimen sa ciudad.
Sa interview sang Bombo Radyo kay MBCCI Chief Executive Officer Frank Carbon, ginpahayag sini nga ginabilin na nila sa mga kapulisan ang pagsolbar sang mga nagakalatabo nga sunod-sunod nga pagpamatay sa Bacolod.
Suno kay Carbon, nakita nila nga ginaubra man sang gobyerno kag kapulisan ang ila ikasarang agud nga matapna ang krimen kag mapabilin ang kalinong sa ciudad.
Suno sa iya, masanag na ang dalan sa mga business areas kun gab-i kay may yara man sang mga pulis nga nagalibot sa dalan.
Gindugang niya man nga indi siya makahambal kun madasig ukon mahinay ang pag-imbestigar sang mga kapulisan bangud yara sa ila ang impormasyon apang nagasalig siya nga wala ang mga ini nagapabaya.
Apisar sang mga krimen, nagapati ini nga malinong sa gihapon ang Bacolod bangud suno sa iya, sang mga nagligad nga bulan man lang nagsugod ang pinatyanay.
Nagalaom man siya nga tinguhaan sang gobyerno kag mga otoridad nga matapna ukon mapahagan-hagan ang mga nagakaangay nga insidente.
