Ginlatag sang Chief Executive Officer sang Metro Bacolod Chamber of Commerce and Industry (MBCCI) ang tatlo ka levels sang ila nakita nga solusyon sa ginapangatubang nga power crisis.
Sa interview sang Bombo Radyo Bacolod kay Frank Carbon, indi problema ang ila nga ginatutukan, kundi ang pagpangita sang solusyon sa problema.
Ang nakita nila nga sitwasyon ang natunga sa store level, distribution utility level, kag sa regulatory body.
Pahayag sang negosyante nga Hulyo pa nag-umpisa ang asod-asod nga power interruptions nga naga-epekto na sa mga negosyo.
Agud makabulig sa solusyon, sa store level sila ang may ginahimo na nga tikang.
Kun sa diin agud mapanubo ang demand, ang mga hotel kag restaurant ang nagabuhin sa konsumo sang ila nga airconditioning system.
Ginlimitahan man nila ang paggamit sang freezer.
Kasubong man sa suga, kun sa diin ginapatay na lamang ang suga sa mga pasilidad sa hotels kag restaurant kun wala man sang tawo.
Samtang sa mga dalagko naman nga kompanya kag korporasyon kaangay sang mga breverage companies kag mga malls nga may dako nga generator, ginapanugyan nila nga magtalana sang oras nga maggamit na lamang sang generator ukon ang ginatawag Interruptible Load Program (ILP), agud indi makadugang sa mataas nga demand sang kuryente.
Pinaagi sini, mahimo nga mapanubo ang tatlo ka oras nga rotational brownout kag mahimo na lamang nga duha ukon isa ka oras.
Sa kaangot nga balita, makabulig naman sa distribution ulitility level ang pagbakal sang 20 megawatts nga battery.
Kun sa diin ang mga public kag private distribution utility ang makabakal sang power supply sa mga renewable energy, agud nga magamit sa tion nga may madula nga power plants sa Grid.
Samtang ginalantaw naman nila nga malab-ot ang National Grid Corporation of the Philippines (NGCP) kag Department of Energy, agud mapamangkot tuhoy sa pag-import sang power supply sa Mindanao Grid kag Luzon Grid.
Panindugan niya nga 450 megawatts ang regular nga gina-import nga power supply sa Mindanao Grid, apang sila ang hinali na lamang nga nag-untat sa paghatag nga wala man sang klaro nga paathag.
Suno kay Carbon, ipanugyan nila nga kun pwede nga ma-ayo nga makahatag sang bisan 100 megawatts na lamang sang power supply.
Samtang ang Visayas Grid ang nagakuha man kuntani sang 440 megawatts sa Luzon Grid.
Apang indi makakuha bangod sa problema sa transmission, bangod ang load ang indi masarangan nga mapatabok sa Leyte, nga suno diri, dapat masolusyonan.
