Gin-athag sang media relations officer sang Vallacar Transit nga indi mapasakay sa mga bus nga nagatanyag sang Libre Sakay ang authorized persons outside residence ukon healthcare workers nga nagabantay sa higad sang dalan.
Ini ang kasunod sang reklamo nga ginpadangat sang isa ka APOR sa Silay nga nagatrabaho sa Victorias City nga wala ini ginpunduhan sang bus nga may signage nga Libre Sakay bisan siya ang nagpapara.
Sa interview sang Bombo Radyo kay Jade Seballos, point-to-point ang mga bus nga nagahatag sang Libre Sakay.
Bangud sini, ang APOR ukon healthcare worker ang dapat nga magsakay sa terminal sa point of origin kag terminal sa point of destination.
Suno kay Seballos, amo ini ang pagsulundan nga gintalana sang Land Transportation Franchising and Regulatory Board kag ila lang nga ginacomply.
May yara sang gintalana nga lugar sa kada LGU suno kay Seballos kun sa diin lang sarang nga makasakay sa Libre Sakay bus kag ginarequire sang ID ang APOR kag healthcare worker.
Dapat man nga siguruhon suno kay Seballos nga may tarpaulin nga Libre Sakay bangud kun wala, magabayad gid sang pamasahe ang nagsakay.
Ang ginaakomodar sa Libre Sakay program amo ang mga APOR kag healthcare workers nga nagapuyo sa mga kabanwahanan sa Negros Occidental apang nagatrabaho sa ciudad sang Bacolod.
May gintalana man nga mga bus nga nagatanyag sini sa ciudad sang Bacolod.
Ang nasambit nga programa ang nagsugod sang Hunyo 1 kag magatakop sa Hunyo 30.
