Nakahanda na nga magrollout sang COVID-19 vaccine gikan sa Sinovac ang Corazon Locsin Montelibano Memorial Regional Hospital subong nga adlaw.
Suno kay Dr. Julius Drilon, medical center chief sang CLMMRH, kapin 900 ang mga empleyado sang ospital nga willing magpabakuna.
Samtang patigayunon naman ini humalin subong nga adlaw tubtob sa Biyernes kun sa diin 100 tubtob 150 naman kada adlaw ang tublukan sang bakuna.
Nahibaluan nga 1,743 ang kabug-usan nga staff sa ospital samtang 1,800 doses naman sang Sinovac vaccine ang ginpadala agud nga magamit sang mga healthcare personnel.
Magluwas sa wala nagpasugot sa pagpabakuna, nabuhinan pa ang listahan bangod sa age limit sang Sinovac Vaccine nga 18 tubtob 59 anyos.
Bisan ang chief of hospital ang wala man makapabakuna sa ginpatigayon nga ceremonial vaccination kahapon bangod nagdangat na ini sa 60 anyos sang Dominggo.
Pagapinsarun naman sini kun sarang pa siya nga maka-avail sa masunod nga mga inadlaw.
Personal naman nga abiso sang doktor nga dapat nga mangin mindset sang tanan nga batunon kun ano man ang una nga mangin available nga bakuna.
Ini bangod bisan ang bakuna nga may manubo nga efficacy rate ang mas maayo nalang kun ipaanggid sa wala nagid sang bakuna.
Paathag naman ni Drilon nga sa karun, ang Sinovac Vaccine palang ang available para sa ciudad sang Bacolod.
Pahayag sini nga nagapabakuna sila agud nga mangin sulundan kag ipakita sa mga pumuluyo nga wala sang dapat ikahangawa sa bakuna.
Suno kay Drilon, ang ikaduha naman nga dose ang igahatag makaligad sang 28 ka adlaw.
