Wala pa ginkumpirmar sang China ang anunsyo ni Presidente Rodrigo Duterte nga makigkita ini kay Chinese President Xi Jinping sa Abril.
Suno kay Chinese Foreign Ministry Spokesperson Zhao Lijian sa isa ka press conference, wala pa ini sang impormasyon nga mahatag tuhoy sa high-level interactions sa tunga sang China kag Pilipinas.
Suno diri, iya igarelease ang impormasyon kun may yara na ini sa nagakaigo nga tion.
Madumduman ng sang Huwebes, ginpahayag ni Presidente Rodrigo Duterte nga nakaschedule ini nga makigkita kay Xi, nga iya gintawag nga maayo nga abyan, sa Abril 8.
Sa iya speech sa Lapu-Lapu City, ginpahayag sini nga maayo ang China kag magaistorya ini kay Xi sa Abril 8 bangud luyag sini nga makighinun-anon sa iya.
Ginkumpirmar sang Malacanang ang meeting sang Biyernes nga suno diri, patigayunon virtually kag yara pa sa preparatory stage.
Suno kay Deputy Palace spokesperson Kris Ablan, wala pa sang agenda para sa meeting.
Ang pahayag sang duha ka pungsod ang natabo matapos nagfile sang fresh diplomatic protest ang Manila batok sa Beijing bangud sa “close distance maneuvering” incident sang isa ka Chinese vessel sa Scarborough Shoal kaupod ang Philippine Coast Guard sang tinalikdan nga bulan.
