Nagapanawagan ang 1st Vice President for Public Relation sang MegaWorld nga untatan ang pagpalapta sang indi husto nga impormasyon angot sa nagluntad nga sunog sa Barangay 27, Bacolod City sang Biyernes sang kaagahon.
Sa interview sang Bombo Radyo Bacolod kay Harold Brian Geronimo, nagakasubo sila sa nagluntad nga insidente kag nagpanindugan nga indi matuod nga wala nila ginpahanugutan nga makasulod ang fire trucks nga magabulig sa pagpalong sang kalayo.
Suno kay Geronimo, wala sang rasun nga indi nila pasugtan nga magsulod ang firetrucks bangod sila ang maapektuhan man hinali nalab-ot sang kalayo ang warehouse sang alcoholic beverage nga Emperador, nga nagaunod sang madamo nga stocks.
Ginkumpirmar sini, nga may mga fire trucks nga ginpasugtan nga makasulod sa ila nga compound agud nga mag-augment sa pagpalong sang kalayo agud malikawan man nga malab-ot ang ila nga warehouse.
Suno diri, wala sang kamatuoran ang post sa social media nga wala sila nagpasugot nga mahatagan sang alagyan ang fire trucks nga nagresponder sa sunog.
Nagpadangat man ini sang pagpakig-unong sa mga nasunugan kag handa man sila nga maghatag sang bulig sa mga fire victims.
