Patay ang isa ka mekaniko nga nagasakay sa motorsiklo matapos makabunggo sa nagapundo nga truck nga nagakarga sang tubo sa Circumferential Road, Barangay Bata, ciudad sang Bacolod alas-8:00 kagab-i.
Suno kay Police Staff Sgt. Richard Dimaala, traffic investigator sang Bacolod Police Station 3, ginkilala ang biktima kay Ronald Ma-it, residente sang Hacienda Vista Alegre 2, Barangay Matab-ang, ciudad sang Talisay, kag mekaniko sa isa ka kompaniya sang salakyan sa Bacolod.
Mahimo nga papauli na ang biktima sang natabo ang aksidente bangud padulong na ini sa Bacolod-Silay Airport Access Road sang nagbunggo sa likod nga bahin sang truck nga buta sang tubo nga padulong sa central sa Victorias.
Suno sa truck driver nga si Michael Mentisa, 24-anyos kag residente sang Barangay Bunga, Salvador Benedicto, nagpahigad sila sa outer lane bangud naglupok ang royda sa nawala nga pangulihi apang nakibot na lamang ang mga ini sang hinali lang may naglagapok.
Sang ila gintsekyar, nagsuhot ang motorsiklo sa nawala nga bahin sang truck samtang nagahigda naman sa dalan ang biktima.
Bangud sa malubha nga pilas, dead on the spot ang mekaniko.
Nagasuksok man sang helmet si Ma-it apang bangud patal ang pilas sini sa ulo kag iban nga bahin sang lawas nga gintunaan sang iya kamatayon.
Si Mentisa ang priso sa karon sa Bacolod Police Station 3 kag ginahulat sang police station ang desisyon sang pamilya.
Suno kay Dimaala, may early warning device ang truck kag may suga sa palibot gani masanag ini apang mahimo nga wala natalupangdan sang mekaniko.
