BACOLOD CITY-Arestado ang isa ka menor de-edad sa buybust operation sang kapulisan sa Purok Lampirong, Brgy. 2 ciudad sang Bacolod.
Ginkilala lamang ang arestado kay Alyas Toy kag nagapang-edaron sang 16-anyos kag isa ka high school student.
Nakuha sa suspetsado ang 8 ka elongated kag isa ka medium-sized sang suspected shabu kag ang P200 nga buybust money.
Suno sa hepe sang Bacolod Police Station 2 nga si Police Senior Inspector Leo Estopa, kapin isa man ka semana ang surveillance nila sa suspetsado.
Ginabulubanta nga nagabug-at sang 2 grams ang suspected shabu nga narekober kag nagabalor ini sang kapin P24,000.
Ginatumod karun sang kapulisan kun sin-o ang ginakuhaan sang suplay sang suspetsado.
Suno kay Estopa, madata sa lugar ang paggamit sang mga supplier sa mga menor de edad bangud sa pagdumdom nga indi makasuhan ang mga ini.
