May ginasuspetsuhan na ang isa ka amay sa mga responsable sa pagpangawat sa ila balay kag paghimulos sa iya menor de edad nga anak sa ciudad sang Bago.
Sa interview sang Bombo Radyo, ginpahayag sang amay nga ginsulod sang duha ka mga lalaki nga nagasuksok sang jacket kag bonnet ang ila balay sa Barangay Calumangan sang Pebrero 14, alas 2:00 sang kaagahon.
Sang amo nga tion, yara sa Iloilo ang amay kag nabilin sa ila balay ang iya misis kag duha ka mga kabataan nga babayi
Naglabay sa bintana ang duha ka mga suspetsado kag wala nakabatyag ang iya misis
Gingapos sang mga suspetsado sa katre ang iya misis kag isa ka anak antes nagsaylo sa pihak nga kwarto kun sa diin nagatulog ang 13-anyos nga dalagita.
Gindala ini sang mga suspetsado sa guwa sang balay kag ginhimuslan.
Suno sa amay, ginpahog ang iya anak nga indi magsinggit bangud siya ang pagapatyon.
Suno diri, huben pa ang mga suspetsado kag nagapati ini nga sa pihak nga purok lang ini nagapuyo.
Mahimo suno sa iya nga kilala sang ila ido ang mga suspetsado bangud wala ini nakataghol.
Suno sa amay, ini ang labing una nga kahigayunan nga natabo ang kaangay sini sa ila lugar.
