Patay ang isa ka menor de edad nga ginakabig nga notorious nga kawatan matapos ginluthang sang wala pa nakilal-an nga suspetsado sa Purok Bayanihan, Barangay Villamonte, Bacolod City kaina sang kaagahon.
Sa interview sang Bombo Radyo Bacolod kay Police Major Charles Gever, commander sang Bacolod Police Station 4, ang biktima nga si Bobby Delos Santos, 17-anyos ang ginluthang sa dalan takna alas-3:45 sang kaagahon.
Bangud sa madamo nga igo sa lawas, gilayon nga ginbawian sang kabuhi si Delos Santos samtang nakapalagyo naman ang suspetsado.
Suno kay Gever, posible may madugay na nga dumot sa biktima ang suspetsado.
Nagagwa sa imbestigasyon sang Police Station 4 nga may record si Delos Santos sang pagpangawat indi lamang sa Barangay Villamonte kundi pati na sa iban pa nga barangay kaangay sang Estefania.
Suno sa hepe nagbiya si Delos Santos sa ila nga balay sa edad nga 9-anyos kun sa diin nag-upod ini sa iya mga abyan agud magpangawat.
