Nagtaliwan na ang menor de edad nga rugby boy nga gintiro sang kaangay man niya nga menor de edad sa gwa sang Gaisano Grand Mall sa Barangay Singcang Airport, ciudad sang Bacolod kagab-i.
Sa interview sang Bombo Radyo kay Police Major Joery Puerto, station commander sang Bacolod Police Station 8, napatay ang menor de edad pasado alas-11:00 kagab-i samtang ginabulong sa Corazon Locsin Montelibano Memorial Regional Hospital.
Santo sa imbestigasyon sang Police Station 8, 16 tubtub 17 anyos ang suspetsado kag tumandok ini sang Bantayan, Bago City apang nagatinir siya sa Singcang Airport bangud may yara ini sang himata sa Purok Neptune.
Sang temprano pa, ginsugo sang suspect ang biktima nga mabakal sang rugby apang wala niya nahatag ang ginpabakal.
Bangud sini, sila ang nagtapungulay apang napierde ang suspetsado.
Nagpauli ang suspect kag naghulam sang pen gun sa iya abyan sa Purok Neptune, nagbalik sa gwa sang mall kag gintiro ang biktima.
Ang menor de edad ang naigo sa natuo nga bahin sang iya tiyan, conscious sang gindala sa Regional Hospital apang ginbawian sang kabuhi makaligad ang apat ka oras.
