Pilason ang menor de edad matapos nga ginbuno sang iya ginkawatan sa Himamaylan City, Negros Occidental.
Ini matapos nga nadakpan sang nagapanag-iya sang inugbulang nga manok nga iya hana nga kawaton.
Ang tag-iya sang manok ang ginkilala kay Regie Castino, 33 anyos, single, tricycle driver kag residente sa Sitio Tuyuman, Barangay Caradio-an, Himamaylan City, Negros Occidental.
Santo sa inisyal nga imbestigasyon, ginabantayan ni Castino ang iya inugbulang nga manok sang nakit-an sini ang suspetsado nga ginakawat ang iya nakahigot nga manok.
Ginlagas sini ang menor de edad kag iya ginbuno sa likod sang makaduha ka beses.
Nahimo pa nga makapalagyo ang nasambit nga menor de edad padulong sa katubuhan apang nahimo man nga madakpan sa bulig sang kaingod balay ni Castino.
Gilayon naman nga nagtawag sa Himamaylan City Police Station ang tag-iya sang manok kag ginreport nga yara sa ila paghinakop ang suspetsado sa pagpangawat.
Gilayon naman nga nagpadulong sa lugar ang Alert Team sang syudad kag ginkuha ang suspetsado.
Narecover sa possession sang suspetsado ang isa ka itom nga bag nga ginsudlan sang manok, ang inugbulang nga manok nga ginabanta balor P2,500 kag isa ka siyam ka bulan nga manok nga may kaangay man nga balor.
Ang suspetsado ang gilayon naman nga gindala sa Governor Valeriano Gatuslao Memorial Hospital para sa pagbulong.
Ang duha ka manok ang ginbalik naman sa tag-iya matapos ang documentation kag pagfile sang kaso.
