Pilason ang duha ka persona kalakip na ang menor de edad nga nagtambag lamang sa insidente sang pagpamuno sa Hacienda Antolanga, Barangay Tinongan, Isabela, Negros Occidental.
Sa interview sang Bombo Radyo Bacolod kay Police Captain Dante Balenario, deputy chief of police sang Isabela Municipal Police Station, ang biktima ang ginkilala nga si Ricky Saballero, 55 anyos, may-asawa kag ang 17 anyos sini nga hinablos nga lalaki.
Samtang ang suspetsado naman ang ginkilala nga si Radamis Gayorgor, 44 anyos, single kag sila ang lunsay residente sa nasambitan nga lugar.
Suno kay Balenario, may daan na nga hiligut-anon sanday Saballero kag Gayorgor.
Sa ila imbestigasyon, ginsulong sang biktima ang balay sang suspetsado agud komprontahon bangod gina-alegar nga ginalingling sini ang bata nga babayi ni Saballero.
Apang hinali na lamang ini nga ginbuno sang suspetsado.
Nakita naman sang 17 anyos ang pagbuno sa iya nga tiyo gani ginbutong niya ini, apang nalab-ot sang suspetsado ang buhok sang minor kag ini ang ginbuno man sa likod.
Ang duha ka biktima ang gilayon naman nga gindala sa Ignacio Lacson Arroyo Memorial District Hospital sa Isabela kag ginrefer sa Corazon Locsin Montelibano Memorial Regional Hospital sa Bacolod City para sa dugang nga pagbulong.
Sa ginpatigayon nga hot pursuit operation, natigayon nga madakop ang suspetsado kag sa karun nakahunong na sa Isabela Municipal Police Station.
Suno kay Balenario, ginahulat na lamang sang mga ini ang medical certificate sang mga biktima bangod ini ang basehan sa igapasaka nga kaso nga mahimo Frustrated Homicide ukon Physical Injury.
