Nadulaan sang kabuhi ang isa ka menor de edad nga lalaki samtang pilason ang duha ka iban pa matapos nga nahulog ang ginasakyan nga traysikol sa pil-as sa Sitio Peñahon, Barangay Minautok, banwa sang Calatrava sang Oktubre 8 sang hapon.
Sa interview sang Bombo Radyo Bacolod kay Police Major Wilfredo Benoman, hepe sang Calatrava Municipal Police Station, pasado alas-4:00 sang hapon sang Oktubre 8, nagluntad ang aksidente sa nasambit nga lugar kun sa diin nagabiyahe papauli ang tricycle sakay ang tatlo ka mga bata nga lunsay naga-edad sang napulo ka tuig kag pag-abot sang mga ini sa lugar sang aksidente nadulaan sang preno ang tricycle bangud madanlog ang dalan kag nahulog ang mga ini sa pil-as nga may kataason nga 15 ka tapak.
Bangud sini nadulaan sang kabuhi ang isa ka bata nga una na nga gindala sa ospital apan gindeklarar nga dead on arrival samtang ang duha ang nasamaran kag gindala naman sa ospital agud madapatan sang pagbulong.
Halin sa eskwelahan ang mga bata kag nagsakay sa tricycle agud magpauli.
Sa karun nakahunong sa Calatrava Municipal Police Station ang tricycle driver kag mahimo mangatubang sang kaso nga reckless imprudence resulting to homicide apang depende pa sa pamilya kun magapasaka sila sang kaso.
