Priso karun ang isa ka mekaniko matapos gin-akusaran nga nang-molestiya sa isa ka menor de-edad sa area nga sakop sang Police Station 8 sa ciudad sang Bacolod.
Pasado alas-11:00 kahapon sang aga sang ginreklamo sa Police Station 8 sang iloy sang biktima nga 14-anyos ang suspetsado nga 41-anyos.
Suno sa panaysayon sang iloy, alas-4:30 kahapon sang kaagahon sang natabo ang insidente sa ila balay kun sa diin nakabugtaw na lamang ang iya bata matapos ginhalukan sang suspetsado kag ginhikap ang pribado nga parte sang lawas sini.
Upod man sang 14-anyos sa kwarto ang iya manghod nga 9-anyos.
Nakasinggit ang biktima gani nagpalagyo ang suspetsado nga ginapahayag naka-underwear lang.
Matapos nga nagreklamo, nagpatigayon sang hot pursuit operation ang kapulisan kag nadakpan ang suspetsado kun sa diin positibo ini nga gintudlo sang biktima.
Apang sa interview sang Bombo Radyo Bacolod sa suspetsado, hugot sini nga ginpanginwala ang akusasyon.
Suno diri, indi matuod nga ginmolestyahan niya ang biktima bangud wala man siya nakabiya sa iya balay kahapon sang kaagahon kun sa diin nabugtawan pa siya sang iya asawa nga nagahampang sang computer.
Apang aminado ang suspek nga kilala niya ang pamilya sang biktima.
Samtang nagapangayo man ini sang pasaylo sa ginikanan sang bata apang handom niya nga maguwa ang matuod.
