BACOLOD CITY – Mapasaka sang kaso ang ginikanan sang 17-anyos nga lalaki nga yara karon sa pag-inakop sang Social Development Center (SDC) nga gina-alegar ginkastigo sang pulis sa sulod mismo sang pasilidad.
Nagreklamo sa Bombo Radyo Bacolod ang mag-asawa nga Ricky kag Elisa Aungon sang Purok BM, Barangay Taculing ciudad sang Bacolod, bangud nga sa pagbisita nila sa ila bata nga si Israel nga yara sa SDC sang nagligad nga Enero 4 sang hapon, nakibot na lamang ang mga ini nga makita ang ila bata nga may mga lagob na sa natuo nga guya, abaga kag sa likod.
Suno kay Elisa, luyag sini nga mapagwa na ang ila bata sa SDC agud madala sa ospital bangud nagareklamo na ini sang palanakit sang lawas.
Sang ginpamangkot naman sini kun sin-o ang nagkastigo sa iya, ginsabat siya sang iya bata nga ang pulis gikan sa Police Station 6 ang nagsakit sa iya.
Samtang, nagapati naman ang amay nga si Ricky nga may mabug-at nga bagay nga ginlampos kay Israel.// Luyag sini nga mahibaluan kun sin-o gid man ang nagkastigo sa ila bata.
Una diri, ginpasibangdan si Israel nga nagpangawat sa ila lugar kag gindakop sang kapulisan sang kaagahon sang Enero 4.
Apang nagapanginwala si Israel nga nagpangawat ini kag ginpanindugan man sang mag-asawa nga nagakatulog sa ila puluy-an ang bata.
Pagkatapos nga gindala sa police station 6, ginturn-over ini sa SDC sang amo man sadto nga adlaw.
Sa karon, tinguhaan sang Bombo Radyo nga makuha ang paathag sang SDC kun may pagpangkastigo gid man nga nagakatabo sa sulod sang ila pasilidad kag paga-usisaon man ang police station 6 kun ano ka matuod ang pahayag sang menor de edad nga isa sa ila mga pulis ang nagsakit sa iya.
