BACOLOD CITY – Patay ang isa ka merchandiser sa isa ka mall matapos nakalampos ang ulo sini sa gutter matapos gina-alegar gin-sipa sang wala pa natumod nga suspetsado sa gwa sang disco bar sa dalan Lacson, Barangay Mandalagan kaina sang kaagahon.
Ang biktima nga ginkilala kay Wilmer Villacapa sang Barangay Tangub, isa ka merchandiser sa mall sa Talisay nga gindeklarar nga dead on arrival sa Corazon Locsin Montelibano Memorial Regional Hospital.
Antes ang insidente, nag-inom ang biktima kaupod ang iya kaupdanan sa trabaho sa MO2 Ice sa Westown Hotel sa dalan Lacson.
Sa interview sang Bombo Radyo Bacolod sa kaupod sini nga si Lyndon Kyle Torre, nagkuha sang mansanas si Villacapa apang ginsita ini sang gwardiya.
Sunod nga nakit-an ang biktima nga nagadalagan pa-gwa sa ilimnan.
Suno kay Manong Jack, saksi sa insidente, nakita sini nga may nagsipa kay Villacapa nga isa ka lalaki nga nakasuksok sang t-shirt nga itom, short nga nagaduag man sang itom kag naka-kalo gikan man sa sulod sang ilimnan nga nagsunod sa biktima.
Nagpalagyo ang suspetsado sakay ang isa ka depam-pasahero nga jeep padulong sa downtown area.
Samtang, natumba kag nalampos ang ulo ni Villacapa sa gutter nga nagtuga sang patal sini nga pilas sa ulo.
Sa pagsekyar sang Bombo Radyo sa regional hospital, si Villacapa ang gindeklarar ni Dr. Kristine Paciente nga patay takna alas-5:10 sang kaagahon.
Sa karon, padayon pa nga ginatul-id ang matuod nga natabo sa insidente kag padayon man ang pagpangita sa nagpalagyo nga suspetsado.
