Siyam ka bloke ang gintupok sang kalayo sa merkado sang Barangay Don Jorge Araneta, Bago City, Negros Occidental, kapin alas-6:55 kagab-i.
Sa interview sang Bombo Radyo kay Senior Fire Officer 1 Rustan Sayson, ang substation supervisor sang Ma-ao Fire Substation, nagdangat sa second alarm ang sunog sa public market bangud nagresponde pa ang mga fire engine sang Bago City Fire Station.
Nangin kabudlayan naman ang pagsulod sang fire truck sa area bangod nga magutok ang dalan.
Nagdangat sa anom ka mga stall ang totally damaged samtang tatlo naman ang partially damaged.
Sa karun suno kay Sayson, under investigation pa ang rason sa nagluntad nga sunog.
Suno sa stall owner nga si Myrflortess Apurado, maayo gid lamang nga nahingagaw sini paggwa ang iya mga baligya antes pa nalab-ot sang kalayo ang iya nga stall.
Samtang wala naman sang nasalbar nga gamit ang iban nga nagapanag-iya sang stall.
Nagpasalig naman ang mga barangay kagawad nga sila ang magapatigayon sang meeting para mabuligan ang mga biktima sang sunog.
