Magaapelar ang chairman sang Commitee on Energy sa National Grid Corporation of the Philippines (NGCP) tuhoy sa asod-asod nga power interruption sa ciudad sang Bacolod.
Sa interview sang Bombo Radyo kay Councilor Kalaw Puentevella, ginalook forward kuntani sang kadam-an ang long weekend bangud holiday sa Mayo 1 apang imbes nga makapahuway, nagakurog-kurog ang ila mga appliances bangud sa low voltage kag power interruption.
Suno kay Puentevella, ang kada isa ang nagakabalaka sa ila mga appliances gani nagalaom ini nga mag-improve ang serbisyo sang NGCP kag mapangitaan sang paagi agud masolbar ang problema.
Suno sa konsehal, halos isa na ka semana nga amu ini ang sitwasyon gani sa masunod nga session, magaapelar ini sa NGCP paagi sa isa ka resolution ukon pagpatawag sang hearing.
Suno diri, iya pagatun-an kun ano ang iya pwede mahimo agud ma-improve kag mastabilize ang kuryente sang ciudad.
Samtang, nagpanugyan man si Puentevella sa mga pumuluyo nga hukson ang plug sang mga appliances kun magbrown out agud indi ini maguba sa hinali nga pagbalik sang kuryente.
Samtang, ginsuhestiyon sang chief executive officer sang Metro Bacolod Chamber of Commerce and Industry (MBCCI) nga makatukod sang coordinating council nga magapungko kag maga-istoryahanay tuhoy sa energy development sa Visayas.
Ini may kaangtanan sa asod-asod nga power interruption sa Visayas subong nga semana.
Sa interview sang Bombo Radyo kay Frank Carbon, kun ang National Grid Corporation of the Philippines (NGCP) ang pahambalon, wala sang problema sa ila samtang kun suno naman sa power generation sa Panay, handa man ang ila nga planta nga mag-generate sang power apang indi ang mga ini makabaton sang enerhiya nagikan sa NGCP.
Indi naman makahatag sang suga ang mga electric cooperatives bangud wala sang kuryente.
Suno kay Carbon, wala sang may maako sa ila gani indi masolbar ang problema.
Nagapati ini nga bangud sa kakulang sang kooperasyon, nagasampaw-sampaw ang gamay nga problema.
Gani nagapati ini nga dapat magtukod sang coordinating council kun sa diin may yara sang representatives nagikan sa transmission, generation kag private distribution utilities kag kun may problema man ukon wala, sila ang makadiskusyon kag makacome-up sang agreement.
Suno diri, dapat pungkuan sang mga ini kag magtrabaho sang matuod-tuod para sa energy development sang Visayas.
Ang ini nga council ang magaforce man sa Department of Energy sa pag-implementar sang mga nagakadapat nga tikang.
Nagapati ini nga kun magpadayon ang ini nga problema, ang business sector amu ang magaantos kag ini ang magapahinay sa economic recovery sa Visayas.
