Nagaayo ang pamunuan sang Metro Bacolod Chamber of Commerce and Industry, Inc. (MBCCI) sa Department of Public Works and Highways (DPWH) nga indi pagpalab-uton ang timeline sa holiday season kag Masskara Festival agud nga indi makatuga sang trapiko bangud madamo na ang nagapauli sa ciudad agud magselebrar sang paskwa kaupod sang ila pamilya.
Sa interview sang Bombo Radyo Bacolod kay Frank Carbon, chief executive officer sang Metro Bacolod Chamber of Commerce and Industry, Inc. (MBCCI), nagahingyo sila kuntani nga indi man pagpalab-uton sang DPWH ang ila nga mga proyekto sa holiday season agud nga indi man mabudlayan ang mga pumuluyo nga magwa agud magpamalaklon ukon ang mga nagpauli diri sa ciudad bangud sa trapiko nga tuga sang mga ginakay-o nga mga dalan sa ciudad.
Suno diri mas maayo nga matalunsay ang pagbiyahe bangud madamo ang manamian magwa agud maglagaw kag magpamalaklon.
Suno kay Carbon, kun wala sang traffic, madamo ang magwa agud magpadulong sa mga malls kag mga restaurants gani madamo man ang mahatagan sang trabaho.
Ginpahayag man sini nga kun madamo sang makita nga kwarta ukon revenues ang mga negosyo sa ciudad, may ibayad na ang mga negosyante sa buwis agud nga may gamiton ang nasambit nga ahensya sang gobyerno sa mga patindugon nga proyekto.
