Kaangay nga may fountain man nga ginhamtang sa Bacolod Downtown Area kasunod sang pagbusawak sang water pipe.
Ginkakibot sang pila ka pumuluyo sang makita ang nagabusawak nga tubig sa tubo sa kilid sang dalan sa Locsin-Luzuriaga Street sa bahin sang Bacolod Downtown Area.
Sa interview sang Bombo Radyo Bacolod kay Alyas Tina, nagatulog kalapit lamang sa area, nga wala pa sang leakage sang sila ang mag-abot ala-1:00 kaina sang kaagahon.
Ginpahibalo na lamang ini sang adlaw na nga nagabusawak na ang tubig sa tubo sang mag-abot ang ila utod.
Wala pa matumod kun ano ang gintunaan sang leakage, apang nakita nga wala na ang kontador sang tubig.
Ginalantaw ni Tina ang posibilidad nga gin-abusaran ang tubo.
Ang pagbusawak sang tubig ang nagadangat sa 8-9 feet.
May ara man sang CCTV sa area, apang wala pa matsekyar.
Gilayon nga ginkapulan sang Hiraya Water Corporation ang nagbusawak nga tubo sa Bacolod Downtown Area.
Sa interview sang Bombo Radyo Bacolod kay Cloyd Sulat, plumber sang Hiraya Water, ginkawat ang metrohan sang water pipe amo nga nagbusawak ang tubig.
Suno diri, indi na ini bag-o nga balita sa ila bangod madamo na sila sang nabatun nga report sang pagpangawat sang metrohan.
\Nawasak man ang semento nga pundasyon sang tubo nga gina-angtan sang metrohan, nga pamatuod sang pagpwersa nga ini ang mabuka kag makuha.
Paathag ni Sulat nga ang mga ginakawat nga metro ang ginabungkag sang kawatan kag ginakwa ang saway.
Suno diri, wala sang may magabakal nga junkshop sang metrohan, sa baylo mahapos mabaligya ang saway kag mahal sa karun ang baklanay sini.
Temporaryo nga ginkapulan anay nila ang tubo agud indi ma-uyang ang tubig.
Ginpanugyan man nila sa tag-iya sang metro nga iblotter ang insidente, kag magrequest sang panibag-o nga metrohan.
May-ara man sang CCTV camera nga mahimo nakacapture sa kun paano kag kun sin-o ang nagkawat sang water meter.
Panugyan ni Sulat sa mga pumuluyo nga mag-aligmat sa nagaduging nga kawatan, kag gilayon nga ireport kun may makit-an nga nagapangawat.
