Nangin madinalag-on ang ginpatigayon nga rally protesta sang mga nagkalain-lain nga grupo kadungan sang pagdumdum sang 124th International Labor Day kahapon, Mayo 1.
Isa sa mga nag-upod ang grupo sang Kabataan Partylist.
Sa interview sang Bombo Radyo Bacolod kay Florence Guzon, Vice President sang Kabataan Partylist Visayas, nag-upod ang mga ini sa mga mamumugon sa pagpanawagan agud nga mapasakaan ang sweldo.
Suno kay Guzon, nagaupod ang mga kabataan bangud sa tion makatapos ang mga ini sa pagtuon nakahibalo sila nga sila ang magatrabaho naman.
Suno diri, ang minimum wage diri sa probinsya ang tuman ka layo sa National Capital Region bangud diri sa isla sang Negros ang yara sa P550 kada adlaw samtang sa NCR ang yara sa P695.
Nagapanawagan ang mga ini nga mahatag na ang P1,200 nga living wage.
Nagapanawagan man ini nga ang mga mamumugon ang mangin hilway sa ani man nga sahi sang exploitation sa ila nga ulubrahan.
Nagaupod man ang mga abugado sa mga mamumugon sa pagobserbar sang 124th International Labors Day kahapon paagi sa pagbuylog sa ginpatigayon nga rally protest sa Bacolod Public Plaza, kahapon, Mayo 1.
Sa interview sang Bombo Radyo Bacolod kay Atty. Wakz Apawan sang National Union of People’s Lawyers, ginaubra nila ang nasambit nga aktibidad kada tuig agud nga ipakita ang padayon nga kabudlayan sang mga mamumugon agud nga malab-ot man nila bisan paano ang pagpangabuhi nga deserve man sang mga ini.
Suno kay Apawan, ang ginapangayo lamang nila nga mga abugado nga maabot ang tion nga ang mga mamumugon ang mabutangan sang pagkaon ang lamesa, mapakaon sang insakto ang pamilya kag ang mga kabataan ang madala sa eskwelahan agud makatuon.
Suno diri luyag lamang nila nga ipakita nga kun ang kinamatarong ukon derecho sang mga mamumugon ang ginlapas may yara ang mga ini sang mapalapitan kag mapangayuan sang bulig.
