Ginatutukan man sang Negros Occidental Police Provincial Office ang imbestigasyon sa pagpatay kay Brian Mark Agillo sa sulod sang ginamaneho niya nga van sa Hacienda Manaol, Barangay Matab-ang, Talisay City sang Hwebes sang kaagahon.
Una na nga ginpahayag ni Bacolod City Police Office director Police Col. Noel Alino nga magabulig sila sa NOCPPO agud matumod ang rason sa pagpatay kay Agillo bangud nagapuyo ini sa Hernaez Street, Barangay 26, Bacolod City.
Suno kay NOCPPO spokesperson Police Capt. Judesses Catalogo, naistorya na sang imbestigador sang Talisay City Police Station ang live-in partner ni Agillo sa Bacolod agud nga makakuha sang dugang nga impormasyon angot sa mga napanugid sini antes siya ginpatay.
May yara man sang backtracking sa aktibidad kag background ni Agillo antes ini gintiro ilabi na nga nakabaton ini sang impormasyon nga may patong sa iya nga ulo apang indi matumod kun para sa ano ang patong.
Samtang, indi naman makapati ang mga malapit nga abyan ni Agillo sa iya nga kamatayon.
Suno kay Leah Habagat, kilalahay sila ni Agillo halin sang sila ang magagmay pa kag kilala niya ini bilang mabuot nga tawo.
Bangud family friend niya si Agillo, may mga tinion pa nga nagakaon ini sa ila balay.
Suno diri, wala gid siya sang ideya nga may kontra si Agillo gani nakibot gid ini sang nabalitaan niya sang Huwebes nga ini ang ginpatay sa Talisay.
