Nakita sa evaluation kag analysis sang Bacolod City Police Office nga madamo sang mga aksidente sa dalanon sa ciudad sang Bacolod subong nga Desyembre ang may kaangtanan sa impluwensya sang makahulubog nga ilimnon nga gikan sa mga Christmas party.
Sa interview sang Bombo Radyo Bacolod kay Police Lt. Col. Ronnie Brillo, commander sang Bacolod City Mobile Force Company, natukiban sang mga ini nga madamo sa mga vehicular accident nga natabo subong nga yuletide season ang bangod sa hubog nga mga drivers nga gikan sa pagselebrar sang Christmas Party.
Pahanumdom sini nga likawan na lamang ang mag-inom kun magadrive ukon kun indi gid malikawan ang mag-inom, likawan nalang ang magdrive ukon magpadrive sa iban.
Dugang pa ni Brillo nga ang ilimnon ang dapat ipasulod sa tiyan kag ini sa ulo, agud malikawan ang mga kinagamo ukon pag-ilinaway sa Christmas party.
Samtang sarang naman nga magcoordinate sa mga kapulisan hinali nga may dalagko nga Christmas Party events nga magakinahanglan sang police assistance.
Sa karun, sila ang wala pa sang nabatun nga reports sang mga insidente may kaangtanan sa Christmas party celebration.
Nagmando man si BCPO Director Police Col. Noel Aliño sa mga station commanders nga magfocus sa dalanon, bangod nagadamo ang mga aksidente nga nagaluntad bangod sa impluwensya sang makahulubog nga ilimnon.
Sa pihak nga bahin, ginpanugyan man sini sa mga firearm holders nga indi magpalupok sang armas luthang sa bag-ong tuig agud malikawan ang insidente nga may maiguan sang stray bullets.
Kun may kaangay nga hitabo, pasalig naman ni Brillo nga bukas ang linya sang Bacolod City Police Office 24/7 nga mahimo macontact, agud sila ang makaresponder.
Panugyan naman sini nga likawan ang magpalupok sang firecrackers sa mga indi nagakaigo nga lugar kag sa tunga sang kagab-ihon nga sarang maka-estorbo sa mga nagakatulog.
