Ginpadal-an na sang Department of the Interior and Local Government sang show-cause order ang mga alkalde sang mga banwa sa rehiyon nga wala nakakumpleto sang pagpanagtag sang social amelioration grant tubtub sa deadline sang Mayo 10.
Suno kay DILG region 6 director Ariel Iglesia, 11 ka mga alkalde sa Western Visayas ang gin-isyuhan sang show cause order kag ini ang nabaton sang regional office sang Mayo 22.
Suno kay Iglesia, naforward na sa provincial directors nga amo ang magaserbe sini sa provincial governor nga amo naman ang maserbe sa mga alkalde.
Ang mga local chief executives nga ginalauman nga makabaton sang show cause order amo ang Calatrava, Negros Occidental; Oton, Alimodian, Tubungan, Leon, kag Tigbauan sa Iloilo province; Macato kag Malinao sa Aklan; Caluya sa Antique; Dumalag sa Capiz; kag Iloilo City.
Sa tion nga mabaton na sang alkalde ang show cause order, sila ang pagahatagan sang 48 oras agud nga magsumiter sang paathag sa departamento.
Ang ila explanation ang igasumiter sa gobernador nga amo naman ang magapasa sini sa DILG.
Pananglitan mapaslawan ang mga alkalde nga magsumiter sang paathag sa sulod sang 48 oras, panibag-o naman ini nga issue nga iga-address sang mga opisyal.
