Nagdangat sa 9,456 ka pamilya kag 37,873 ka indibidwal ang naapektuhan sang Bagyong Kristine sa Western Visayas.
Sa interview sang Bombo Radyo Bacolod kay Office of the Civil Defense Region 6 Director Raul Fernandez, sa nasambit nga apektado, 4,196 ka indibidwal ukon 1,207 ka pamilya ang nagapabilin sa evacuation center sang apat ka probinsya sa Rehiyon 6.
Ini ang ginalakipan sang probinsya sang Antique, Capiza,Iloilo kag Guimaras.
Suno kay Fernandez, nga wala sang narecord nga casualty sa bug-os nga rehiyon kag kalabanan sang mga evacuees ang resulta sang preemptive evacuation.
Suno diri 169 ka mga balay ang naguba kag 20 sa mga ini ang totally damaged bangud sa bagyo.
Wala man sang nagkinahanglan nga marescue paagi sa airlift bangud wala man sang isolated areas sa rehiyon nga naapektuhan.
Sa karun padayon man ang pagbantay sang Office of the Civil Defense sa nagapasulod nga bagyo sa Philippine Area of Responsibility (PAR) nga hingadlan nga Tropical Storm Leon.
