Nagdangat sa 6,797 ka indibidwal ukon 2,042 ka pamilya ang mga yara sa karun sa evacuation centers bangod sa mga pagbaha sa nagkalainlain nga banwa kag ciudad sa Negros Occidental.
Sa pahayag ni Negros Occidental Governor Eugenio Jose “Bong” Lacson, ang record ang gikan sa mga evacuation centers sa 13 ka mga local government units, kag wala pa malakip ang mga outside evacuation centers.
Nahibaluan nga alas-10:00 kagab-i, walo pa lamang ka LGUs ang nagreport nga nakarecord sang pagbaha, apang sa karun ini ang nagsaka na sa 13 ka LGUs.
Pahayag ni Negros Occidental Governor Eugenio Jose “Bong” Lacson
Ini ang ginabug-usan sang 65 ka Barangay nga ginalakipan sang pito sa Himamaylan City, lima sa Ilog, apat sa Candoni, anom sa Hinigaran, isa sa Calatrava, apat sa Moises Padilla, walo sa Pontevedra, lima sa Hinobaan, apat sa Cauayan, apat sa Binalbagan, 10 sa Isabela, anom sa Sipalay City kag 11 sa Kabankalan City.
Suno kay Lacson, kalabanan sa Southern Negros Occidental ang apektado ukon sa 5th kag 6th District sang probinsya.
Ginpaidalom sa Red Rainfall Warning ang kalabanan sa Southern Negros Occidental, orange rainfall warning naman sa San Carkos City tubtob Hinobaan kalakip na sa Bacolod City, samtang yellow rainfall warning naman sa kalabanan sa Northern Negros Occidental.
Pasalig ni Lacson nga suportado nila kun may-ara sang LGU nga magadeklarar sang state of calamity.
