Nagapati ang isa sa mga residente sang Purok Dampsite, Barangay Cansilayan, Murcia, Negros Occidental nga madala lamang sa maayo nga estorya ang paghatag sang solusyon sa problema sa mabaho nga higko sang mga manok nagikan sa Taala Farm.
Sa interview sang Bombo Radyo Bacolod kay Nancy Tubongbanua, wala man ang mga ini naghambal nga magsirado ang nasambit nga poultry farm kundi luyag lamang sang mga ini masolusyunan ang mabaho nga higko sang mga manok.
Suno diri, sila nga malayo na nagikan sa poultry ang makabatyag sang pag-usbong sang baho, gani nagapati ini nga mas malala ang pag-antos sang mga malapit sa poultry farm.
Ginpahayag sini nga nakahibalo sila nga dako nga bulig sa ekonomiya sang banwa kag sa probinsya ang poultry farm apang dapat wala sang perwisyo nga ginahatag sa mga pumuluyo.
Nagapanawagan ini sa alkalde nga kuntani pamatian man ang mga sentimyento sang mga pumuluyo.
Wala ang mga ini nagapangayo nga manirado ang Taala Farm kundi mahatagan lang sang solusyon ang ila problema sa higko sang manok agud indi na mangin problema sang madason nga henerasyon.
Sanday Tubongbanua ang naghulat sang masobra duha ka oras sa Cansilayan Farm School matapos ang anunsyo ni Murcia Mayor Gerry Rojas nga magapatigayon sang meeting upod sa tag-iya sang Taala Farm, mga concerned agencies kag gin-imbetar man ang iban nga luyag magtambong alas-10:00 kahapon sang aga.
Apang wala sang abiso nga ginsaylo ang venue sa Murcia Municipal Hall ala-1:00 sang hapon, kag ini ang close door meeting nga indi na imbetado ang mga complainants kag bisan ang media.
