Ginkumpirma sang Office of the Provincial Agriculturist nga nagdamo pa gid ang numero sang nahalitan sang Fall Army Worms sa probinsya sang Negros Occidental.
Suno kay Nilo Basco, pinuno sang Provincial Crop protection Coordinator Section sang Negros Occidental Office the Provincial Agriculturist, siyam na tanan ka Local Government Unit ang apektado sang pagduging sang Fall Army Worms.
Ini ang ginalakipan sang ciudad sang Himamaylan, Kabankalan, kag banwa sang Binalbagan, Isabela, Moises Padilla, Ilog, La Castellana, Cauayan, kag Murcia.
663 tanan ka mga mangunguma sa 40 ka mga barangay ang apektado kun sa diin nagdangat sa 558.32 ka ektarya sang pananom ang nahalitan.
Suno kay Basco, padayon ang ila nga pagspray sang pesticide sa mga pananom nga mais kag humay samtang gintugyan naman nila sa Sugar Regulatory Administration ang nahalitan nga tubo.
Sa karun, indi pa mapagwa ang kabug-usan nga balor sang halit samtang ginaverify pa ang rekord sang mga naapektuhan sang Fall Army Worms.
