Una na nga naghatag sang mga foodpacks kag hygiene kits ang Bacolod City Government sa mga nasunugan sa Purok Kagaykay, Barangay 2, Bacolod City samtang wala pa ang financial assistance.
Sa Interview sang Bombo Radyo Bacolod kay Department of Social Services and Development (DSSD) Head Alma Gustillo, padayun pa ang assessment sang mga social workers sa mga biktima agud mahatagan sang nagakaigo nga bulig.
Sa inisyal nga record ang mga biktima ang ginalakipan sang 81 ka pamilya ukon 276 ka indibidwal.
Ini ang ginabug-usan sang 84 ka lalaki kag 70 ka babayi nga adults, 55 ka lalaki kag 39 ka babayi nga kabataan, pito ka lalaki kag lima ka babayi nga senior citizen, isa ka person with disability (PWD), tatlo ka lalaki kag tatlo ka babayi nga infant, duha ka nagabusong, duha ka nagabreastfeed nga iloy kag lima ka 4Ps beneficiaries.
Sa kabug-usan may 73 ka totally damaged nga balay kag walo ka partially damaged nga balay kun sa diin ang totally damaged ang makabatun sang P15,000 cash, P10,000 sa partially damaged kag P5,000 para sa mga renters.
Ang financial assistance ang ipaagi sa Bayad Agad program sang gobyerno.
Nagpanawagan man ini sa mga interesado nga magbulig nga ang labi nga kinahanglan sa karun sang mga biktima amo ang kitchen utensils, habol, bulong kag tsinelas, bangod madamo ini sang nakita nga mga kabataan nga wala sang tsinelas.
Sarang naman nga magdangop sa ila kun luyag nga mag-avail sang rellocation program apang ang mga ini ang i-assess pa sang Bacolod Housing Authority.
Nagpasalig sang P10,000 cash para sa mga totally damaged nga balay, P5,000 sa partially damaged samtang hatagan man ang mga renters kag sharers si Bacolod City Lone District Congressman Greg Gasataya sa sunog sa Purok Kagaykay, Barangay 2, Bacolod City kaina sang kaagahon.
Sa interview sang Bombo Radyo Bacolod sa kongresista, 73 ang totally damaged, 8 ang partially damaged kag wala pa nalakip ang mga renters kag sharers.
Ang mga biktima ang temporaryo naman nga nagatinir sa multipurpose gym sang simbahan.
Suno diri alas-6:00 sang aga pa lamang nagcontact na ini kay Punong Barangay Imelda Banguanga kag siya ang nag-abot sa lugar pasado alas-7:00 sang aga.
Aminado ang kongresista nga ang una gid nga dapat masabat amo ang matulugan kag mga pagkaon kag ilislan sang mga biktima.
Ginatinguhaan man ni Gasataya nga mapadasig ang paghatag sang financial assistance gikan sa iya nga opisina agud nga magamit sang mga biktima sa liwat nga pagtukod sang ila mga panimalay.
Suno diri, sila ang nagapangita lamang sang ID agud maka-avail sang financial assistance, apang inkaso nga wala gid sang may nasalbar nga mga IDs, sarang man nga magdangop sa Barangay Hall nga nakahanda man nga maghatag sang temporaryo nga ID.
Pasalig sang kongresista nga ang bulig ang indi lang para sa mga opisyal nga residente sang Barangay, kasubong man ang mga indi rehistrado nga botante basta mapamatud-an lang nga naga-istar sa nahalitan sang sunog.
