Padayon nga matawhay ang pagpatigayon sang Western Visayas Regional Athletics Association Meet 2024 sa 32 tanan ka venues sa probinsya sang Negros Occidental.
Sa interview ang Bombo Radyo Bacolod kay Hernani Escullar Jr., public information officer sang DepEd Region 6, wala sang untoward incidents nga nagluntad samtang ginapatigayon ang hinampang.
Suno diri, may yara sang mga na-injured kag napilasan nga mga atleta apang ini ang normal lamang nga kabahin sang hampang.
Wala naman sang may namonitor nga naapektuhan ang mga athletes bangod sa tuman ka init nga tiyempo kasunod nga nahimo nga na-adjust ang oras sang hinampang.
Kasubong man nga wala sang may nareport nga naglain ang pamatyag sa mga athletes samtang nagatinir sa billeting areas.
Nagpasalig naman ini nga may yara sang mga medical officers nga gilayon nga magaresponde.
Samtang, sa medal tally naman as of 6:00 pm kahapon, sa secondary level nagapanguna ang probinsya sang Iloilo nga may duha ka gold medal kag duha ka silver medal kag ini ang ginasundan sang Negros Occidental nga may isa ka gold medal kag Aklan nga may isa ka silver medal kag duha ka bronze medal, samtang ang Antique, Capiz, kag Guimaras wala pa sang may naangkon nga medalya.
Sa elementary level, nagapanguna sa gihapon ang Iloilo nga may isa ka gold medal kag isa ka silver medal, Aklan nga may isa ka gold medal, Capiz nga may isa ka silver medal kag isa ka bronze medal, kag Negros Occidental nga may isa ka bronze medal, samtang wala sang may naangkon nga medalya ang Antique, kag Guimaras.
Sa Paragames, may yara sang anum ka gold medal ang Iloilo, Ngeros Occidental nga may tatlo ka gold medal, kag Aklan nga may isa ka gold medal.
Ang mangin champion sa WVRAA Meet 2024 amo ang magahampang sa Palarong Pambansa 2024 sa Hulyo nga patigayunon sa Cebu.
